O noso campión chámase Luis Pernas e ven de gañar o título de Campión do Mundo de Culturismo, no transcurso do Campionato do Mundo de Culturismo celebrado o pasado 25 de outubro en Roma (Italia). Deste xeito, convértese no primeiro deportista en gañar no mesmo ano os dous galardóns máis importantes no mundo do culturismo: Mister Universo e Campión do Mundo.

No Campionato do Mundo de Culturismo celebrado recentemente, déronse cita na súa categoría 14 competidores de 14 países diferentes, de entre os que resultou gañador o naronés Luis Pernas. O culturista superou a outros rivais (todos campións nacionais e algúns campións de Europa). En total participaron neste campionato 300 deportistas. 

Pero o bo traballo de Luis non é flor dun día... No pasado mes de xullo, Luis Pernas acadou tamén o dobre título de Mister Universo 2014 (nas categorías absoluta e talla media). Ademáis, ten no seu palmarés cinco títulos de Campión de España de Fisioculturismo. Pernas é propietario do ximnasio Revolution Fitness e da tenda de dietética Natural Sport, ambos ubicados en Narón.

Por ter chegado ó máis alto no deporte do culturismo, o Alcalde de Narón, José Manuel Blanco, ofreceralle unha recepción institucional o próximo venres 7 de novembro de 2014.