O Mercado Medieval de Narón comezará esta tarde, a partir das 18.00 horas, no Parque do Río Freixeiro. Trasladarémonos esta fin de semana á época do medievo coa ambientación deste evento organizado polo Concello e que contempla un completo programa de actividades a levar a cabo durante tres días. A edil de Feiras e Mercados, Mar Gómez, valorou a programación desta convocatoria e convidou a veciños e visitantes a gozar das actividades previstas.

Preto dun centenar de postos de venta ocuparán boa parte do Parque do Río Frexeiro, onde a partir das 18.30 horas de hoxe sucederanse espectáculos musicais, de malabarismo e cómicos. Non faltarán tampouco os lanzadores de coitelos, a maxia e o lume, que durante toda a tarde e boa parte da noite amenizarannos a noite. Ollo que algunhas persoas irán vestidas con traxes de época, para gozar da que xa é a cuarta edición do Mercado Medieval. Produtos artesáns, gastronomía, oficios tradicionais e xogos e atraccións para os máis pequechos da casa, completarán a oferta desta convocatoria.

O programa continuará desenvolvéndose mañá e o domingo, a partir das 11.00 horas, coa reapertura dos postos do mercado e ademais, a partir das 11.30 cos divertidos espectáculos que protagonizarán grupos de maxia, baile e tamén cómicos e lanzadores de coitelos. Pola tarde, durante as dúas xornadas, o Mercado Medieval reabrirá ás 18.00 horas e continuarán os entretidos espectáculos matinais.

Entre as novidades do último día, o domingo, ás 22.15 horas comezará “La captura del dragón” (cunha figura de tres metros de alto por seis de longo), e a maiores haberá un pasarrúas musical amenizando a celebración. 

Vémonos en Freixeiro!