Como? Que non o sabedes? Chámase Dolores Graña Freire e o dende o Concello decidiron distinguir a Dolores con este título polo seu traballo na Asociación de Veciños Virxe do Mar, durante 13 anos, algúns de nós nin nacéramos!

O Concello de Narón acolleu o pasado 6 de febreiro o acto institucional de Nomeamento da Muller do Ano 2014. Como xa vos diexmos, o galardón recaeu na ex presidenta da Asociación de Veciños Virxe do Mar, Dolores Graña Freire, quen ocupou o cargo entre os anos 1999 e 2012.

A Corporación Municipal, representada polos voceiros dos partidos políticos que a compoñen, participou nun acto sorpresa no que o Alcalde de Narón, José Manuel Blanco, foi o encargado de anunciar a Dolores Graña (coñecida coma Lola) o seu nomeamento. “Con esta recepción, o Concello de Narón recoñece tódolos anos de traballo de Dolores Graña a prol dos seus veciños”, declarou o Alcalde, engadindo que “hai moitas outras mulleres que tamén están facendo un traballo destacado pero resulta imposible homenaxealas, por iso intentamos recoñecer en Lola a todas elas”.

Tamén a Concelleira de Igualdade, Teresa Sabio, tivo verbas de agradecemento para a Muller do Ano 2014. “Pode ser un exemplo para que tódalas mulleres nos impliquemos na sociedade na medida das nosas posibilidades, e que loitemos por conseguir un mundo mellor” sinalou a edil, quen referiuse a Dolores Graña coma “unha muller traballadora á cal a vida non lle foi sempre fácil”.

Na recepción institucional celebrada no Concello, fíxose entrega a Dolores Graña dun ramo de flores e un broche, que lucirá na Cea das Mulleres prevista para o venres 14 de marzo no restaurante “A Trasanquesa” (Sedes). Estamos a tempo de reservar praza! Pódense reservar as entradas chamando ó Concello (981 33 77 00- extensións 1108 ou 1113). O prezo das entradas é de 15 euros! Ñam!

En Narón a celebración dos actos conmemorativos aínda non remataron co paso do 8 de marzo, Día Internacional da Muller, quédanos pendente:

• O mércores 12 de marzo organizarase unha mesa redonda baixo o título: “Educando en Igualdade”, ás 18:00 horas no Local Social Municipal de O Alto.

• E por último, o xoves 15 de maio confeccionarase un Mural conmemorativo, entre tódalas mulleres asistentes, na Praza de Galicia ás 18:00 horas.