O Concello manterá aberto dende o vindeiro luns, día 17, ata o 8 de xullo o prazo para solicitar axudas municipais para material didáctico e escolar para alumnado de centros públicos ou concertados e de comedor para centros concertados no curso académico 2019-2020
No caso das axudas para material didáctico e escolar poderán solicitalas familias empadroadas en Narón con fillos escolarizados en educación Infantil (2º ciclo), educación Primaria, ESO, Bacharelato, FP de ciclos medios, educación Secundaria de adultos e centros de educación especial.
En canto ás axudas municipais de comedor escolar para alumnas e alumnos de colexios concertados da cidade, diríxense ás familias residentes e empadroadas en Narón, con fillos/as matriculados en centros docentes concertados de segundo ciclo de educación Infantil, educación Primaria e Secundaria para o curso 2019-2020 con dificultades socioeconómicas e de conciliación da vida familiar e laboral.
En ambos casos as solicitudes deben presentarse no Rexistro xeral do Concello de luns a venres, en horario de 8.30 a 13.30 horas a través dun modelo que se pode obter –tamén a partir do luns 17- no propio Rexistro, na Sede Electrónica do Concello –donde tamén se poderán tramitar- ou por calquera dos medios previstos no art.16 da Lei 39/2015, de 1 de outubro, do Procedemento Administrativo Común das AAPP. Para máis información tamén se pode consultar o Boletín Oficial da Provincia de hoxe, donde están publicadas estas axudas, ou a páxina web municipal, no enlace: http://www.naron.es/web/cat/es/axudas-e-subvencions.