O IES das Telleiras será, tal e como indicou Romero, o primeiro centro público de Galicia no que se impartirá esta materia entre alumnado de primeiro curso de ESO. Tres representantes do alumnado, Álvaro Aneiros, Carolina Yáñez e Claudia Rego asistiron tamén ao acto de presentación que tivo lugar esta mañá no Concello. 

A xefa provincial de Tráfico felicitou a Narón “por ser quizais o primeiro dos concellos da Comunidade Autónoma nos que se pon en marcha esta materia de libre configuración oficial no currículo escolar de Galicia”. Para a DXT, asegurou, “era un reto importante deseñala e dirixila a un destinatario que xa estaba traballando en educación e seguridade viaria dende hai moito tempo. O feito de que sexa Narón, cunha tradición moi ampla e unha implicación moi importante por parte do Concello e da sociedade foi o resultado de aunar esforzos entre todos”. Gómez, tamén agradeceu a excelente disposición do IES As Telleiras e o alumnado por estar “ilusionados con este gran proxecto”. Serán os docentes os encargados de dirixir os traballos a realizar pero dende a DGT apoiaranse actividades extraescolares, avanzou, como coñecer como funciona un centro de xestión de tráfico, o traballo que realiza o helicóptero da DXT, ou como traballa a Garda Civil en estrada cando ten que axudar a alguén. “Son cousas que vos servirán ao longo da vosa vida e que espero que vos gusten e aproveitedes”, destacou. 

Pola súa parte, a directora do IES As Telleiras asegurou que dende o centro “estamos encantados de aceptar este reto, aínda que é unha gran responsabilidade”. Alves destacou a aposta dos docentes, en especial de Aurora Romar por este proxecto, “e sen esa voluntariedade non sería posible”. A propia Romar agradeceu o respaldo, dende o primeiro momento, da DXT, do Concello e do propio centro para participar neste proxecto e incidiu en que o alumnado está “moi moi participativo, con gañas de aportar ideas e para min iso é un orgullo”. As clases impartiranse unha hora á semana de aquí a finais de curso e nas mesmas participarán 75 alumnas e alumnos do centro.

Entre os obxectivos desta iniciativa está o de promover modos de mobilidade sostibles e seguros na sociedade e, neste caso concreto co alumnado, promovendo accións participativas que favorezan unha mobilidade segura como peóns, usuarios de medios de transporte, conductores de bicicletas… mellorando condutas e comportamentos viarios nos seus desprazamentos para previr accidentes de tráfico e inculcándolles hábitos viarios seguros, tal e como se indicou dende a DXT.

Finalmente, o concelleiro de Seguridade Cidadá agradeceu á DXT que apostara polo Concello de Narón para ofrecer esta formación e a colaboración do IES As Telleiras. Así mesmo, animou ao resto de centros de Narón a que en vindeiros cursos se impliquen tamén nesta iniciativa e ofreceu “a total colaboración do Concello para este tipo de iniciativas”. Romero aproveitou a ocasión para agradecer tamén o respaldo que dende a comunidade educativa en particular e a sociedade naronesa en xeral se brinda a cantas actividades se impulsan a través do equipo de Educación Viaria do Concello, do que destacou o seu labor.