Un grupo de mulleres embarazadas recibiu información sobre as vantaxes da matronatación, así como das posturas máis axeitadas para practicar esta actividade, entre cuxos obxectivos está tolerar mellor o embarazo, combartir nalgúns casos o sobrepeso e preparar á nai para o momento do parto e de cara á súa posterior recuperación. Unha monitora encargouse de dar as oportunas explicacións ás mulleres que esta mañá acudiron á actividade, cunha parte práctica e outra teórica que se desenvolveron na piscina municipal da Gándara entre as 11.30 e as 12.30 horas. 

O programa matinal incluíu ademais o “Parking day” sobre “Biblioteca na rúa”, de 10.00 a 12.00 horas, informando aos veciños e veciñas que se achegaron ata o posto sobre os servizos bibliotecarios do Concello, e tamén unha nova sesión de contacontos nas escolas infantís, nesta ocasión na de Piñeiros, sobre a obra “Moucho e Cuquiña”. Esta última actividade protagonizárona alumnos e alumnas da Escola de Teatro do Padroado da Cultura de Narón.

Ás 16.30 horas comezará un taller para embarazadas sobre “Porteo do bebé” e outro acerca da “Seguridade no automóbil e sistemas de retención infantil”, impartidos ambos por profesionais na materia. Ao finalizar as mesmas sortearase unha silla para o coche, unha ecografía en 4D e un fular portabebé. 

Mentres se desenvolvan esas actividades na Biblioteca, o local social do Alto acollerá un “Curso teórico práctico para acompañantes de transporte escolar”, a cargo de persoal dos equipos de Educación Vial e de Emerxencias do Concello de Narón. A parte teórica comezará ás 17.00 horas e a práctica sobre as 18.00, cando se iniciará na praza de Galicia un simulacro dun sinistro nun autobús, para que os asistentes, poñan en práctica o aprendido na parte teórica da actividade. Unha chamada ao 112 iniciará o procedemento a seguir, para a continuación mobilizar aos corpos de seguridade e sanitarios, que se desprazarán ata a citada praza e cuxa colaboración agradeceron desde a organización do evento.

Na praza da Gándara, entre as 17.00 e as 20.00 horas convocáronse “Parking day” sobre: “Encontro de palilleiras” e un contacontos de “Moucho e Cuquiña”, a cargo este último de alumnado da Escola de Teatro do Padroado da Cultura de Narón.

O programa de actividades da Semana da Mobilidade e Seguridade Vial rematará mañá. Ás 10.00 horas sairán de todos os colexios os participantes na “IX Marcha Ciclista Escolar”, na que participarán algo máis dun milleiro de nenos e nenas de centros educativos do municipio e cuxa chegada ao paseo marítimo de Xuvia está prevista ás 11.30 horas. De 11.50 a 12.10 haberá unha demostración de clase de zumba nesa mesma ubicación, onde os rapaces e rapazas gozarán dunha xornada deportiva e lúdica ata regresar de novo cara aos colexios, sobre as 12.15 horas. Tamén ao longo da mañá, ás 10.30, haberá unha sesión de contacontos da obra “Moucho e Cuquiña”, nesta ocasión na escola infantil da Solaina.

O Parque Fluvial do Río Freixeiro acollerá os últimos “Parking day” desta convocatoria, con “Xogos populares” dirixidos a nenos e nenas de todas as idades. Poderán participar de balde todos os asistentes. A Asociación Parque Freixeiro dirixirá esta actividade.

Esta fin de semana, o sábado e o domingo, celebrarase o “I Congreso Galego de Seguridade e Educación Vial Cidade de Narón” no auditorio municipal, unha convocatoria que reunirá a varios profesionais desta área na localidade.