A Concellería de Mocidade, presidida pola edil Natalia Hermida, promove obradoiros de Educación afectivo-sexual e Asesorías de sexualidade entre as actividades enmarcadas na área de Educación para a saúde.
Estas convocatorias, que se desenvolven en horario lectivo, diríxense a alumnos e alumnas de segundo curso de ESO e están ubicadas no período 2015-2016 nos IES das Telleiras e Terra de Trasancos e no CPI O Feal.
A concelleira de Mocidade anunciou que os Obradoiros de educación afectivo-sexual se impartirán nos meses de novembro e decembro, previa solicitude no Servizo Sociocomunitario do Concello de Narón.
Nas sesións traballaranse cos menores temas como:
- a prevención de embarazos non desexados,
- as enfermidades de transmisión sexual,
- ou os métodos anticonceptivos, entre outros.
- “Ampliar os coñecementos sobre estes temas por parte dos rapaces e rapazas dos centros de ensinanza da localidade é un dos obxectivos desta iniciativa, coa que se trata de ofrecerlles toda a información posible de cara a que coñezan de primeira man as situacións ás que poden enfrontarse”, explicou Natalia Hermida.
A segunda opción son as Asesorías de sexualidade, que comezaron a impartirse o pasado 19 deste mes nos IES Terra de Trasancos e As Telleiras e que tamén se levaron a cabo no CPI O Feal. Este dispositivo permanecerá activo nos centros educativos ata rematar o curso e conta cun profesional que asesora aos adolescentes sobre os recursos existentes a nivel municipal e solventa as súas dúbidas en materia de sexualidade, tal e como recordou Natalia Hermida.
- No caso do IES Terra de Trasancos o servizo estará dispoñible os luns, en horario de 10.10 a 10.30 e no IES As Telleiras o mesmo día pero entre as 12.10 e as 12.30.
- No colexio do Feal atenderase os venres de 12.05 a 12.25 horas.
Sexualidade, afectividade, análise crítica dos estereotipos de xénero e condutas sexistas, fisioloxía sexual e manexo de situacións de risco son algún dos contidos cos que traballarán os usuarios deste servizo.