Este programa consiste en axudas económicas para a posta en marcha de iniciativas xuvenís, entendidas estas como proxectos liderados pola mocidade de Galicia, que se desenvolvan durante o ano 2016, e nos cales a mocidade sexa a verdadeira protagonista, participando activamente no deseño, na planificación e na realización das actividades.

A finalidade

A súa finalidade é fomentar e consolidar a participación libre e eficaz da mocidade no desenvolvemento político, social, económico e cultural. Tamén promover a adecuada utilización do lecer, a calidade de vida e o benestar dos mozos e mozas da nosa comunidade autónoma, a través de proxectos integrais e específicos de actuación.

As áreas de atención prioritarias que se han desenvolver mediante as iniciativas xuvenís son as seguintes:

1. Iniciativa Xove Emprendedora: proxectos que permitan á mocidade concretar as súas ideas no ámbito do emprendemento e da empregabilidade.
2. Proxectos de fomento de actitudes creativas, innovadoras, participativas e de liderado da xuventude na súa comunidade e no seu contorno, así como de fomento da accesibilidade de mozos e mozas con discapacidade a actividades culturais e de lecer.
3. Proxectos que permitan a participación en experiencias de educación non formal en distintos campos.
4. Proxectos relacionados coa creación de espazos para a comunicación e coas novas tecnoloxías.
5. Proxectos que fomenten a participación e a dinamización das mulleres novas galegas para que colaboren activamente na toma de decisións, na xestión e na execución desde o asociacionismo ou desde os grupos informais.
6. Proxectos que contribúan á conservación do medio ambiente e posta en valor do patrimonio natural.

A quen vai dirixido?

1. Os grupos informais de mozos/as que desexen realizar unha iniciativa xuvenil.
2. As asociacións xuvenís e as entidades prestadoras de servizos á mocidade que carezan de interese de lucro e as súas respectivas federacións sempre que, no caso destas últimas, o proxecto que presentan non sexa o mesmo que o de cada unha das asociacións/entidades que as conforman.

Que requisitos hai que cumprir?

1. As asociacións xuvenís e as entidades prestadoras de servizos á xuventude e as súas respectivas federacións deberán estar inscritas no censo oficial dependente organicamente da Dirección Xeral de Xuventude e Voluntariado.
2. Os grupos informais deberán estar formados por un mínimo de 5 e un máximo de 8 mozos/as con idades comprendidas entre os 18 e os 30 anos no momento de presentar a solicitude, debidamente identificados/as, e un/unha deles/as asumirá o papel de representante único do grupo e con poderes suficientes para cumprir as obrigas que, como beneficiario/a, lle corresponden ao grupo. Así mesmo, será necesario que o grupo teña unha denominación que o identifique.

Só se poderá presentar un proxecto por solicitante e o seu orzamento total non poderá ser superior a 5.000 euros.

Cal é o prazo de presentación de solicitudes?

1. O prazo para presentar solicitudes estará aberto ata o 4 de abril de 2016.

Onde tramitalo?

1. Nesta dirección web: https://sede.xunta.es/ no procedemento BS306B.

Máis información?

1. DOG do 3 de marzo de 2016 que podes descargar ao pé desta nova.