A Concellería de Promoción Económica pechará o vindeiro luns, día 6 de xuño, o prazo de inscrición no “Curso práctico de elaboración de tapas” organizado no marco do programa municipal “Narón Gastronómico”.
As persoas interesadas en anotarse nesta actividade, que previsiblemente se desenvolverá os días 13, 20 e 27 deste mes, deben chamar ao número de teléfono 607 082 232 ou enviar un correo electrónico ao mail: promocioneconomica@naron.es. As clases impartiráas o prestixioso cociñeiro galego Xoán Crujeiras, profesor do IES Fragas do Eume de Hostalería e copropietario do restaurante “A Estación”, en Cambre, a Coruña, cunha Estrela Michelín e un Sol Repsol entre as distincións obtidas polo seu traballo.
A convocatoria diríxese a persoal de locais de hostalería do municipio, co obxectivo de dotalo dunha serie de coñecementos que lles permitan mellorar e ampliar a oferta e presentación de tapas nos seus establecementos. As persoas que se inscriban participarán en tres grupos nas clases ,dunha xornada por grupo, que se impartirán os luns entre as 17.00 e as 19.30 horas, tal e como se acordou cos representantes do sector.