Este concurso xa é unha tradición que cada ano convoca a Consellería de Política Social, a través da Dirección Xeral de Xuventude, Participación e Voluntariado.

O deseño gráfico é unha das túas paixóns? Por que non participas?

1. REQUISITOS? Para participar tes que ter entre 18 e 30 anos, residir en Galicia e non ser a persoa gañadora da última edición. 
2. TEMÁTICA? O tema e a técnica son libres. 
3. COMO TEÑEN QUE SER AS OBRAS? As obras deben incluír o texto “Programa Xuventude Crea 2016”, e as especialidades que o compoñen: artes plásticas, banda deseñada, cociña, deseño de xoias, fotografía, graffiti, moda, música, relato breve, poesía, teatro e  videocreación.
4. INDIVIDUAL OU GRUPAL? Admitiranse traballos realizados tanto de forma individual como en grupo.

CONDICIÓNS

• Cada autor/a ou autores/as poderán participar con 2 obras orixinais, inéditas e en galego.
• A obra premiada pasará a ser propiedade da Dirección Xeral de Xuventude, Participación e Voluntariado, que adquirirá sobre esta o dereito pleno á súa utilización, reprodución e difusión.
• A citada Dirección Xeral queda facultada para introducir algunha modificación na obra premiada se existira algunha dificultade técnica para a súa impresión ou para introducir algún texto ou logotipo que non figure inicialmente nestas bases.

Que pasa co cartel gañador? O cartel será a imaxe do Programa Xuventude Crea 2016. Ademais poderá utilizarse parcial ou totalmente para deseñar a web e outras iniciativas que considere a organización.

Cómo presentar as obras?

1. En formato vertical.
2. Cunhas dimensións de 50x70 cm.
3. Montadas en superficie ríxida (cartón pluma) que facilite a súa manipulación.
4. Hai liberdade de procedemento e de cor.
5. Deberán estar feitas en formato dixital para poder facer as modificacións que a Dirección Xeral de Xuventude, Participación e Voluntariado considere oportunas.
6. NON poden levar nin o nome nin a sinatura.

Todas as obras irán acompañadas dos seguintes documentos:

• Solicitude de inscrición debidamente cuberta: http://xuventude.xunta.es/uploads/docs/xuventude_crea/2016/ficha_de_inscricin.pdf
• Ao dorso de cada obra figurará un lema ou pseudónimo que servirá para preservar a identidade do/a artista ata o fallo do xurado: en letras maiúsculas, no exterior dun sobre pechado aparte, sen facer alusión ningunha que permita identificar ao autor/a, sendo causa de exclusión do concurso o incumprimento desta norma.
• No sobre pechado irán os datos do/a artista: nome, apelidos, fotocopia do DNI, idade, enderezo postal, enderezo electrónico, teléfono de contacto, ficha explicativa e CD da obra e unha declaración asinada indicando que o traballo é orixinal e inédito.
• Se se apreciasen defectos ou falta de documentación por parte da Dirección Xeral de Xuventude, Participación e Voluntariado, requirirase á persoa solicitante para que no prazo de 10 días emende a falta ou achegue os documentos preceptivos, con indicación de que, se así non o fixese, se considerará desistida da súa petición.

Onde presentar as obras?

• O prazo de admisión das obras estará aberto ata o día 29 de febreiro de 2016 e poderanse enviar por correo postal a:

Concurso deseño do cartel programa Xuventude Crea 2016

Consellería de Política Social

Dirección Xeral de Xuventude, Participación e Voluntariado

Edificio Administrativo San Lázaro, s/n, 3º

15781 Santiago de Compostela

Tamén se pode entregar a documentación en calquera rexistro, en horario de 9:00 h a 14:00 h, presentando a solicitude de inscrición para o seu posterior selo de entrada.

Quen decide que obra é a gañadora?

1. A composición do xurado farase pública na páxina web da Dirección Xeral de Xuventude, Participación e Voluntariado http://xuventude.xunta.es
2. O fallo difundirase mediante unha nota na citada web e por teléfono a partir do día seguinte do fallo do concurso.
3.  

   Antes do fallo do xurado, a Dirección Xeral de Xuventude, Participación e Voluntariado poderá levar a cabo unha exposición dos traballos presentados.

    

4. O fallo do xurado será inapelable e poderá ser declaro deserto se así o considera este.

Cal é o premio?

• O/a autor/es/as da obra gañadora recibirá un único premio de 500 euros. Esta cantidade estará suxeita á lexislación vixente, aplicándose sobre a dita cantidade as retencións legalmente establecidas.
• A entrega do premio farase mediante transferencia bancaria ao número de conta que facilite o gañador/a.

Quen coida das miñas obras?

• A Dirección Xeral de Xuventude, Participación e Voluntariado porá o máximo coidado nas obras recibidas, pero declina toda responsabilidade de perdas, roturas, roubos, furtos ou danos nas obras por razón de forza maior ou calquera outra causa allea á súa vontade, tanto nos actos de recepción e devolución como durante o tempo que estean baixo a súa custodia.

Para retirar as obras non gañadoras:

1. Persoalmente.
2. Mediante delegación, por escrito, noutra persoa no lugar onde foron entregadas, no prazo de 30 días que se contarán a partir do día seguinte ao da publicación do/a gañador/a na web da Dirección Xeral de Xuventude, Participación e Voluntariado.

As obras non premiadas que non foran retiradas polas persoas interesadas no prazo establecido, pasarán á libre disposición da Dirección Xeral de Xuventude, Participación e Voluntariado.

A participación neste concurso implica de forma automática a plena e total aceptación, sen reservas, das presentes bases.

Dúbidas? Máis información?

• Se tes dúbidas ou precisas máis información mediante contacto coa Dirección Xeral de Xuventude, Participación e Voluntariado nos teléfonos 981 541 689, 981 545 702 e 981 545 937; e no correo roteiros.ctb@xunta.es.