Marián Ferreiro, Concelleira de Cultura, anunciou os actos do programa xunto ao presidente da Asociación de Veciños Rosa dos Ventos de Sedes, Miguel Galán; e a secretaria e un dos vocais da mencionada AVV, Julia Montero e Juan Yáñez:

Venres día 31

1. 21.00 horas: Recreación de renacemento do Lume Novo Solsticial na Aldea Castrexa
2. 22.00 horas: Noite de Música Galiciana, a cargo de Treixadura Gaiteiros.

Sábado 1 de agosto

1. 11:00 horas: Apertura da campa castrexa ás 11.00 horas. Haberá mercadiño artesán e unha mostra de artesanía con cestería e madeira, na que participarán diversos artesáns procedentes de diferentes concellos galegos. Obradoiro de cociñado de porco ao espeto. Na nave central da Feira do Trece haberá tamén varias exposicións que trasladarán a veciños e visitantes á época castrexa.
2. 14.00 horas: Oenach Gastronómico, no que poderemos degustar menús cociñados ao xeito castrexo. Veciños e veciñas de Sedes serán os encargados de preparar o menú, no que non faltarán as bolas de sartén, o pan de millo e a carne ao caldeiro.
3. Despois da comida: actuacións teatrais, unha exhibición de Jugger –un xogo que mistura a loita medieval e o rugbi-
4. 22.30 horas: Noite do Castro, coa recreación teatral no castro de Eiravedra da obra “A fraga maldita”, cun elenco formado por un gran número de veciños e veciñas de Sedes, que integran a Grande Compañía de Teatro Comunitario de Sedes.
5. 00.30 horas: Chourizada popular na Feira do Trece, onde se reunirán os comensais. A xornada nocturna estará amenizada por tres grupos musicais. 

Domingo 2 de agosto

1. 11.00 horas: Recreación museística viva da Aldea Castrexa e exhibicións caninas
2. 14:00 horas: Teatro e a comida celta, nesta ocasión con porco celta e xurelo lañado como menú do Oenach Gastronómico
3. Pola tarde: Exhibición de xogos populares, unha carreira popular ao Castro de Eiravedra –aberta a todas as  idades e na que se poderán inscribir as persoas interesadas media hora antes de iniciarse.
4. 20.30 horas: Entrega de trofeos e posteriormente á clausura do Oenach Atlántico de 2015.

A edil naronesa, Marián Ferreiro, animou a veciños/as e visitantes a desprazarse a vindeira fin de semana a Sedes para gozar do variado programa deseñado este ano para conmemorar a décimo sétima edición do Oenach, unha celebración declarada Festa de Interese Turístico de Galicia. Desde o Concello habilitaranse zonas de estacionamento na parte traseira da nave do Trece e nas inmediacións do castro, tal e como se fixo en anteriores edicións.

Descarga o programa: