O prazo de inscrición nesta actividade abriu onte, ás 16.00 horas, debendo tramitalas no mostrador da sala de adultos da Biblioteca ou chamando pot teléfono ao número 981 382 173 no horario de apertura das instalacións. A concelleira de Bibliotecas, Mercedes Taibo, recordou que os menores que se inscriban deben ter o carné da Rede de Bibliotecas sen sancións pendentes. Esta acción, así como outras que se desenvolven este mes tanto na Biblioteca como nas axencias da lectura municipais da Solaina e A Gándara, enmárcase nos actos programados desde o Concello con motivo do Día Mundial do Libro, que se conmemora hoxe.

Na actividade os participantes ilustrarán un texto, untando o dedo en pintura e traballando sobre papel para, ao finalizar, expoñer o resultado nas propias instalacións da Biblioteca para que o poidan ver a vindeira semana todas as persoas que se acheguen ás instalacións.

Así mesmo, na Axencia de Lectura Municipal da Gándara permanece instalado esta semana un photocall, xusto á entrada da Casa da Mocidade, con diferentes elementos para que as persoas que acudan poidan sacarse unha fotografía co seu libro favorito. A fotografía subida a Instagram e con máis número de “gústame” ata o 28 deste mes nomeando a conta @bibliotecadenaron e coa etiqueta #OMeuLibroFavoritoBPN recibirá como agasallo un lote de libros, podendo estar as fotos sacadas neste espazo habilitado desde o Concello ou noutros.

Na Axencia de Lectura Municipal da Solaina tivo lugar onte , de 18.00 a 19.00 horas, un Obradoiro de elaboración de marcapáxinas, dirixido a nenas e nenos de 3 a 6 anos. Hoxe, nestas mesmas instalacións haberá unha sesión de contacontos, para menores de 3 a 12 anos, na que os protagonistas tamén serán os nenos e nenas, sendo os de máis idade os que se encargarán de contar diferentes historias aos máis pequenos, coa axuda de educadoras para seleccionar e preparar os seus contos favoritos e compartilos cos compañeiros e compañeiras. Esta actividade será de 16.00 a 17.00 horas.